小辰光个动物朋友

  现在每天吃过晚饭以后,小区里经常可以看到交关养狗个人聚了一道遛狗,几个相熟个邻居互相聊聊狗经,狗狗呢就辣空地浪向追来追去穷白相。想起阿拉小辰光,搿种情景倒是呒没看到过,因为埃歇辰光大家屋里向侪基本浪向勿养狗嗰,但是阿拉小辰光倒也有自家个动物朋友。

  每年到了春天,阿拉就会小心翼翼拿出去年蚕蛹下个虫卵,开始养蚕宝宝。一般虫卵侪是被放辣纸盒里,纸盒浪向钻几只洞,放辣阴凉干燥又通风个地方。等搿眼黑黑个小虫卵变成一条条纤细个蚕宝宝,辣纸盒里向爬来爬去个辰光,我就会兴致勃勃个去买来桑叶,开始喂养蚕宝宝。其实,我当时一直对虫卵变蚕宝宝个过程邪气感兴趣,所以每次我侪想熬夜,看看伊拉到底是哪能变化嗰,可惜每趟侪会睏着,错过观察个机会。然后,我又会再次下定决心,到明年一定要多观察,勿要到关键个夜晚又睏着,但是搿个愿望一直呒没实现。

  每趟买桑叶至少要买五分钱,否则人家勿会卖给侬,但是如果当年孵化出来个蚕宝宝勿多,一开始是吃勿光嗰,所以我就和小朋友一道想出来爬到桑树上去采桑叶,吃多少就采多少,搿个应该是我小辰光做过个最调皮个事体了。因为有些桑树是长辣人家屋里个院子里向,阿拉就互相叠罗汉,去采已经从院子里长到墙外个树叶。有一趟被人家发觉了,人家大叫一声,吓得阿拉撒腿就逃,连滚带爬,后来有相当长一段辰光阿拉侪勿敢去采了。

  蚕宝宝真个是日长夜大,每一天伊拉侪会发生变化,用勿了多少辰光,蜕掉几层皮以后,身体就滚滚壮了,白白个皮肤浪有一层光泽,就像丝绸一样。辣我个印象里,每趟去看伊拉,伊拉侪辣辣从上到下、顺着桑叶个边啃,吃到最后,只有当中个茎留下来,一点也勿会浪费。每天趴辣台子浪向看伊拉吃好桑叶,再拿盒子里个排泄物清理干净,添上新鲜桑叶,我侪会觉得特别满足,好像完成了一桩老重要个事体一样,迭个过程绝对可以培养小朋友个耐心和责任心。

  直到有一天,蚕宝宝勿吃桑叶了,就是伊拉准备开始吐丝了。今天晚上开什么马,每趟看到伊拉开始吐丝,我侪会趴辣看交关辰光,但是每年我总归想勿通,伊拉做啥要用丝拿自家裹起来,就算后来学了“作茧自缚”搿个成语,我还是会觉得伊拉老戆呃。

  等到盒子里侪是一只只晶莹雪白个蚕茧了,我就特别期待伊拉破茧而出。从蚕茧里飞出来个蛾一定会把虫卵产在盒子里,伊拉才会放心飞走,好像伊拉晓得养蚕人一定会照顾好伊拉个小宝宝一样。小辰光个我当然勿会懂得实际浪向当蚕宝宝终于化蛾飞走,伊拉个生命也就走到头了,想想是蛮伤感嗰。但是小辰光看伊拉飞走了只是觉得神奇,觉得伊拉自由了,可以想去啥地方就去啥地方了。我会拿盒子藏好,期待明年春天到来……